Gen 20 | NdeIBE | STEP | U-Abhrahama wathutha kuleyondawo waya emmangweni wase-Negebi wayahlala phakathi kweKhadeshi leShuri. Okwesikhatshana wake wahlala eGerari,

Genesis 20

U-Abhrahama lo-Abhimeleki

1 U-Abhrahama wathutha kuleyondawo waya emmangweni wase-Negebi wayahlala phakathi kweKhadeshi leShuri. Okwesikhatshana wake wahlala eGerari, 2 lapho u-Abhrahama athi khona ngomkakhe, “Ngudadewethu.” Yikho u-Abhimeleki inkosi yaseGerari yathi uSara kalethwe yazithathela.

3 Kodwa uNkulunkulu wafika ku-Abhimeleki ephutsheni ebusuku wathi kuye, “Usufile wena ngenxa yomfazi omthetheyo; ngumfazi owendileyo.”

4 Kodwa u-Abhimeleki wayelokhu engakamthinti, yikho wathi, “Jehova, uzasibhubhisa isizwe esingelacala na? 5 Katshongo kimi yini wathi, ‘Ngudadewethu,’ laye katshongo na wathi, ‘Ungumnewethu’? Ngikwenzile lokhu ngingelasazela langezandla ezimhlophe.”

6 Yikho uNkulunkulu wasesithi kuye ephutsheni, “Yebo, ngiyakwazi ukuthi lokhu ukwenze ungelasazela, yikho ngikuthintile ukuthi ungenzi isono kimi. Yikho ngingakuyekelanga wamthinta. 7 Manje mbuyisele umfazi womuntu, ngokuba umuntu lowo ungumphrofethi, uzakuthandazela ukuthi uphile. Kodwa uma ungambuyiseli yazi ukuthi wena lakho konke okungokwakho kuzakufa.”

8 Ngakusasa ekuseni kakhulu u-Abhimeleki wabiza zonke izikhulu zakhe, kwathi esezitshelile konke okwenzakeleyo, zesaba kakhulu. 9 Yikho u-Abhimeleki wasebiza u-Abhrahama wathi, “Usuwenzeni kithi manje? Ngikone ngani uze ulethe ukona okunje phezu kwami lombuso wami na? Wenze kimi izinto okungafanelanga zenziwe.” 10 U-Abhimeleki wabuza u-Abhrahama wathi, “Besiyini isizatho sakho sokwenza lokhu na?”

11 U-Abhrahama waphendula wathi, “Ngazitshela ngathi, ‘Ngempela kakukho ukumesaba uNkulunkulu kule indawo, yikho bazangibulala ngenxa yomkami.’ 12 Ngaphandle kwalokho, uvele ungudadewethu, indodakazi kababa kodwa engasuye kamama; waba ngumkami. 13 Kwathi uNkulunkulu esengisusile emzini kababa ngathi kuSara, ‘Nansi indlela ongatshengisa ngayo uthando lwakho kimi: Noma ngaphi lapho esiya khona, ubokuthi ngami, “Ungumnewethu.” ’ ”

14 Kwathi u-Abhimeleki waletha izimvu lezinkomo, lezichaka zesilisa lezesifazana wazipha u-Abhrahama, wabuyisela uSara umkakhe kuye. 15 Njalo u-Abhimeleki wathi, “Nanti ilizwe lami uyalibona; ungahlala lapho othanda khona.”

16 Wathi kuSara, “Umnewenu ngimupha amashekeli esiliva ayinkulungwane. Le iyinhlawulo yehlazo elenziwe kuwe phambi kwabantu bonke bakini; usugeziwe.”

17 U-Abhrahama wasekhuleka kuNkulunkulu, uNkulunkulu wamsilisa u-Abhimeleki, lomkakhe lamantombazana akhe ayizigqili ukuthi sebengaba labantwana njalo, 18 ngokuba uJehova wayesezivalile zonke izizalo endlini ka-Abhimeleki ngenxa kaSara umka-Abhrahama.